Shoqëria civile takon kryeprokurorin e Prokurorisë Speciale, Blerim Isufaj
Përfaqësues të organizatave joqeveritare kanë takuar sot kryeprokurorin e Prokurorisë Speciale të Republikës së Kosovës, Blerim Isufaj, me të cilin kanë diskutuar për sigurinë digjitale të gazetarëve, aktivistëve dhe përfaqësuesve të shoqërisë civile, si dhe për nevojën për parandalimin dhe adresimin e kërcënimeve, sulmeve dhe formave të tjera të dhunës apo gjuhës së urrejtjes, në përputhje me legjislacionin në fuqi.
Gjatë takimit, përfaqësuesit e shoqërisë civile i shprehën kryeprokurorit Isufaj shqetësimet e tyre lidhur me rënien e lirisë së medias. Ata potencuan rëndësinë e sistemit prokurorial dhe atij të drejtësisë në mbrojtjen e lirisë së fjalës e të mediave, si dhe theksuan nevojën për rritjen e mbrojtjes ndaj aktivistëve dhe gazetarëve, duke kërkuar që këto çështje të prioritizohen.
Në takim morën pjesë përfaqësues të Asociacionit të Gazetarëve të Kosovës (AGK), Lëvizjes FOL, Rrjetit Ballkanik për Gazetari Hulumtuese (BIRN Kosova), Sbunker, Asociacionit të Mediave të Pavarura Elektronike të Kosovës (AMPEK), Iniciativës Kosovare për Stabilitet (IKS), Nismës së të Rinjve për të Drejtat e Njeriut (YIHR), Hibrid Info, Institutit të Prishtinës për Studime Politike (PIPS), Qendrës për Zhvillimin e Grupeve Shoqërore (CSGD) dhe Qendrës Kosovare për Studime Gjinore (QKSGJ), si dhe gazetarja Saranda Ramaj dhe aktivistja Flutura Kusari.











