SafeJournalists: Kërcënimi me vdekje ndaj gazetares së N1, Nina Kljenak, në Kroaci duhet të hetohet urgjentisht
Rrjeti SafeJournalists dënon ashpër kërcënimin me vdekje dhe mesazhet fyese, mizogjene dhe nacionaliste drejtuar gazetares së N1, Nina Kljenak, dhe u bën thirrje autoriteteve kroate që urgjentisht të identifikojnë dhe të ndjekin penalisht personin përgjegjës.
Më 11 shtator 2026, Kljenak mori në redaksinë e N1 një letër që përmbante kërcënim të drejtpërdrejtë ndaj sigurisë së saj. Në mesazh thuhej, ndër të tjera: “Fundi YT po afrohet. Të gjithë në N1 TV do ta paguajnë shtrenjtë, veçanërisht udhëheqësi juaj TIHIRAT”, duke iu referuar me sa duket ish-kryeredaktorit të saj, Tihomir Ladišić, përmes një loje fyese me emrin e tij. Mesazhi përmbante gjithashtu një sërë fyerjesh degraduese, mizogjene dhe me përmbajtje etnike ndaj Kljenak, si dhe kërcënime ndaj kolegëve të saj në N1.
Rrjeti SafeJournalists u bën thirrje autoriteteve kompetente kroate që ta hetojnë rastin pa vonesë, të identifikojnë dërguesin dhe të ndërmarrin të gjitha masat e nevojshme për të garantuar sigurinë e Nina Kljenak dhe kolegëve të saj në N1. Kërcënimet ndaj gazetarëve duhet të trajtohen me seriozitetin e duhur dhe personat përgjegjës duhet të mbajnë përgjegjësi.
Sulmet me bazë gjinore dhe kërcënimet mizogjene ndaj grave gazetare janë një formë serioze e frikësimit, që synon t’ua mbyllë gojën dhe t’i pengojë në punën e tyre. Autoritetet duhet t’i trajtojnë këto raste me seriozitet të veçantë. Kërcënimet ndaj gazetarëve krijojnë një klimë frike që cenon lirinë e medias dhe të drejtën e publikut për t’u informuar.
Rrjeti SafeJournalists shpreh solidaritet të plotë me Nina Kljenak dhe redaksinë e N1 dhe do t’i informojë institucionet dhe organizatat përkatëse kombëtare dhe ndërkombëtare për këtë rast. Çdo sulm ndaj gazetarëve është sulm ndaj demokracisë, interesit publik dhe të drejtave themelore të njeriut.
Prishtinë – Shkup – Sarajevë – Zagreb – Beograd – Podgoricë – Tiranë, 13 shtator 2026
Shoqata e Gazetarëve të Shqipërisë
Asociacioni i Gazetarëve të Kosovës
Shoqata e Gazetarëve të Maqedonisë
Asociacioni i Gazetarëve të BH-së
Shoqata e Gazetarëve të Kroacisë
Asociacioni i Pavarur i Gazetarëve të Serbisë
Sindikata e Mediave të Malit të Zi
