Kandidati për Asamblenë e Leposaviqit, presion dhe akuza ndaj redaksisë së portalit “Kossev”
Asociacioni i Gazetarëve të Kosovës (AGK) dënon sjelljen e Radoica Radomiroviq, kandidat për Asamblenë Komunale të Leposaviqit, ndaj redaksisë së portalit nga Mitrovica e Veriut, Kossev.
Radomiroviq, ish-zëvendësministër në Qeverinë e Kosovës, që tashmë garon me listën “Novo Lice – Narodna Prava”, ka ushtruar presion ndaj një gazetareje të Kossev-it për shkak të pyetjeve të parashtruara në një konferencë për shtyp.
Ai i ka kërkuar asaj llogari për pyetjet, duke i sugjeruar madje se çfarë duhet të pyesë. Pas shprehjes së pakënaqësisë nga redaksia, Radomiroviq i ka shkruar kryeredaktores, Tatjana Lazareviq, duke e akuzuar se “Kossev është filial i organizatës kriminale SL (Lista Serbe)”.
AGK-ja dënon fuqishëm këtë sjellje të politikanit Radomiroviq, që përbën intimidim direkt ndaj punës profesionale të gazetarëve.
AGK-ja e fton Radomiroviqin të kërkojë falje, si dhe apelon tek ai dhe të gjithë politikanët që të sillen me përgjegjësi ndaj mediave dhe gazetarëve, veçanërisht gjatë kësaj kohe të fushatës zgjedhore.
