Lajmet

Rrjeti SafeJournalists dënon fuqishëm sulmet e përsëritura dhe të koordinuara me bot-e që kanë shënjestruar profilet zyrtare në Instagram të medias “Sloboden Pechat”, dy prej të cilave ndodhën javën e kaluar.

Sipas informacioneve të disponueshme, brenda pak minutash, mijëra llogari të dyshimta, kryesisht nga jashtë vendit, kanë ndërvepruar masivisht duke pëlqyer postimet në profilet e kësaj medieje, gjë që tregon një aktivitet të organizuar dhe keqdashës me synim minimin e integritetit të saj digjital. Veprime të tilla mund të krijojnë përshtypjen se këto pëlqime janë gjeneruar artificialisht nga vetë media, duke çuar potencialisht në pezullim të përkohshëm ose të përhershëm të llogarisë.

Këto incidente nuk janë të izoluara, por pjesë e një serie sulmesh të përsëritura gjatë pesë muajve të fundit, duke dëshmuar një trend të qartë dhe shqetësues të ngacmimit sistematik digjital dhe presionit ndaj një medieje. Sulme të tilla përbëjnë një kërcënim serioz për lirinë e medias, pavarësinë e saj dhe të drejtën e publikut për t’u informuar. Është veçanërisht shqetësuese që platforma Meta, pronare e Instagram-it, nuk ofron mekanizma efektivë për mbrojtjen e profileve publike të mediave dhe profileve të hapura në përgjithësi nga këto lloj sulmesh. Rekomandimet për “mbylljen” e profileve nuk janë të zbatueshme për mediat, pasi kufizojnë drejtpërdrejt shtrirjen, transparencën dhe rolin e tyre në shërbim të interesit publik.

Rrjeti SafeJournalists u bën thirrje Ministrisë së Punëve të Brendshme të Maqedonisë së Veriut dhe njësive kompetente kundër krimit kibernetik që të veprojnë urgjentisht, të zhvillojnë një hetim të plotë, të përcaktojnë origjinën e këtyre sulmeve dhe të ndëshkojnë përgjegjësit.

Po ashtu, u bëhet thirrje institucioneve përkatëse të zhvillojnë mekanizma sistemikë për mbrojtjen e mediave nga sulmet digjitale, si dhe të forcojnë bashkëpunimin me kompanitë ndërkombëtare të teknologjisë për të parandaluar abuzime të tilla. Njëkohësisht, u kërkohet organizatave ndërkombëtare të monitorojnë nga afër këtë rast dhe të insistojnë në një reagim efektiv institucional dhe në mbrojtjen e lirisë së medias në hapësirën digjitale.

Rrjeti SafeJournalists rikujton se sulmet digjitale ndaj mediave janë një formë gjithnjë e më e zakonshme presioni që mund të minojë seriozisht pluralizmin mediatik dhe proceset demokratike. Institucionet kanë detyrimin të sigurojnë një mjedis të sigurt për gazetarët – si në hapësirën online ashtu edhe offline.

Rrjeti SafeJournalists do të vazhdojë të monitorojë dhe dokumentojë raste të tilla, si dhe të informojë publikun, duke kërkuar përgjegjësi dhe mbrojtje efektive kundër mosndëshkimit.

Prishtinë – Shkup – Sarajevë – Zagreb – Beograd – Podgoricë – Tiranë, 15 prill 2026

Shoqata e Gazetarëve të Kroacisë
Asociacioni i Gazetarëve të Kosovës
Shoqata e Gazetarëve të Maqedonisë
Shoqata e Gazetarëve të Bosnjë dhe Hercegovinës
Shoqata e Pavarur e Gazetarëve të Serbisë
Sindikata e Mediave të Malit të Zi