Zgjedhet Kryetari dhe Anëtarët e rinj të Bordit të AGK-së
Gazetarë, kameramanë e fotoreporterë, kanë votuar gjatë ditës së sotme, në Kuvendin Zgjedhor të Asociacionit të Gazetarëve të Kosovës. Kryetar i organizatës është rizgjedhur, Xhemajl Rexha, edhe për një mandat tjetër trevjeçar. Ai ka fituar 161 vota, kurse kundërkandidati i tij, Mentor Buzhala, 31.
Me Statutin e votuar sot, parashihet të jetë edhe pozita e nënkryetarit/kryetares, në të cilën është përzgjedhur gazetarja e Radio Dukagjinit, Naile Dema Selmani, e cila ishte edhe në mandatin e kaluar pjesë e bordit. Ajo ka fituar 95 vota.
Teksa, shtatë (7) anëtarë të tjerë janë zgjedhur: Milot Hasimja - (Klan Kosova) – 95 vota, Florande Morina (T7) - 90 vota, Blerta Dalloshi (TV Klan) – 88 vota, Mehmet Krasniqi (TV Dukagjini) – 84 vota, Fatlum Jashari (ATV) – 80 vota, Jehona Hulaj (Telegrafi) – 73 vota dhe Besnik Velija (Gazeta Express – 59 vota.
Asociacioni i Gazetarëve të Kosovës falënderon të gjithë kolegët që kanë marrë pjesë në Kuvendin e sotëm, duke diskutuar e votuar Statutin e ri të AGK-së, si dhe në votimin e kryesisë së re. Gjithashtu, AGK-ja, falënderon edhe KQZ të cilët na kanë huazuar kutitë dhe kabinat e votimit, Korporata Ujë Rugove për donacionin e bërë me shishe të ujit, dhe Filarmoninë e Kosovës për ofrimin e ambientit për shfrytëzim.
